Спорт журналисі Қыдырбек Рысбек жаңа қызметке тағайындалды
Мәдениет және спорт министрі Дәурен Абаев ведомствоға қарасты бірнеше мекеменің жаңа басшыларын тағайындады.
Солардың арасында белгілі спорт журналисі, менеджер Қыдырбек Рысбек те бар. Ол «Дене шынықтыру және спорт жөніндегі республикалық оқу-әдістемелік және талдау орталығы» РМҚК директоры қызметіне тағайындалды.
Қыдырбек Рысбек — 1962 жылы 14 шілдеде Ақмола облысында дүниеге келген. 1985 жылы Қазақ педагогика институтын бітірген. 2004 жылы – А. Байтұрсынов атындағы Қостанай мемлекеттік университетінің Дене шынықтыру және спорт факультетін тәмамдаған. Әр жылдары Қазақстан Республикасының Туризм және спорт жөніндегі агенттігінде, Қ. Мұңайтпасұлы атындағы республикалық спорт интернатының директоры, Оңтүстік Қазақстан облысы дене шынықтыру және спорт басқармасының басшысы, қысқы спорт түрлері бойынша республикалық жоғары спорт шеберлігі мектебінің директоры және т. б. қызметтерде болған.
