Жарыстың бірінші күнінде Қазақстан қоржынына 1 күміс, 3 қола медаль түсті
Күні кеше ғана Бразилияның Кашиас-ду-Сул қаласында жалауы көтерілген XXIV жазғы Сурдлимпиаданың алғашқы күнінде Қазақстан құрамасының спортшылары 4 медаль жеңіп алды.
Дзюдодан Алдыбек Нұрмұхамед (60 кг) финалда қарсыласына жол беріп, күміске қол жеткізсе, Фериде Караоғлы (48 кг), Дина Иржанова ( 52 кг), Шаяхмет Қанапиянов (73 кг) өз салмағында үздік үштіктің қатарынан көрінді.
Осылайша, жарыстың бірінші күнінде Қазақстан делегациясы 1 күміс, 3 қола медальмен жалпыкомандалық есепте 16-орынға жайғасты.
Көш басында 12 алтын, 3 күміс, 9 қоласы бар Украина құрамасы тұрса, 4 алтын медаль иеленген Жапония 2-сатыда. Екі алтыны бар Иран, Венесуэла мен АҚШ спортшылары үшінші орынды өзара бөлісіп тұр. Әзірге 20 мемлекеттің өкілі тұғыр сатысына көтерілді.
Сурдлимпиада жарыстары 15 мамырға дейін жалғасады.
