Бибісара Асаубаева туралы не білеміз?

«Алғашқы шахмат үйірмесіне барғанымда жеті жас­тағы ұлдармен ойнап жүрдім. Алғашқы үш айда тек жеңіліп жүрдім. Үйге жылап келетінмін. Анам сол кезде «мүмкін қажет емес шығар, осымен тоқ­тарсың» дейтін. Сосын арада уақыт өте келе жеңіске жете бастадым. Сол кезде қатты қуандым», деді Б.Асаубаева.
Халықаралық дәрежедегі спорт шебері Олег Дзюбаннан тәлім алған ол алты жасында төртінші разрядқа ие болды. Астана қаласының чемпионатында сегіз жастағы қыздармен ойнап, бірінші орын алды. Осыдан кейін оның жұлдызды шағы басталды. Жеті жасында әлем чемпионы атанды. Соның арқасында Fide Master дәрежесіне ие болды. Бибісара – мұндай дәрежеге қол жеткізген әлемдегі ең жас шахматшы.
«Басында қыз болғандық­тан әрі кішкентай екенімді ай­тып, бапкер қабылдамады. Бі­рақ ата-анам көндіруге тырысты. Бәлкім, бірдеңе шығып қалар деп үгіттеді», деді шахматшы.
Шерлок Холмстың барлық кітаптарын оқып тауысқан Бибісара бала күнінен ойыншыққа емес, кітапқа құмар болып өсті.
Бибісараның немере ағасы Бағлан Асаубайұлы Майлы­баев бірнеше жыл Президент әкімшілігі басшысы орынба­сары қызметін атқарғанын білеміз. Шахматшы қыздың анасы Лиана Таңжарықова дәл осы Бағлан Асаубайұлының Бибісараға көп кедергі келтіргенін бұрынғы сұхбаттарында айтқан-ды.
«Мен күйеуіммен ажырасып кеткенмін. Біз әлем чемпионатынан алтын медаль алып келгеннен бастап Бибісараның ағасы жан-жақтан тосқауыл қойды. Бұл туралы сол кезде көбі білді, бірақ жағдайды өзгерту мүмкін емес еді. Себебі ол Қазақстанның жоғары қызметтегі шенеунігі болатын. Нақты бір уақыттан кейін біз­ді түрлі іс-шараларға қатыс­тырмайтын болды, маңызды оқиғалардан біздің атымыз­ды сызып тастады», деп жаз­ған болатын Таңжарықова Facebook парақшасына.
Елдегі қысым көбейген соң, бір кездері Ресейге көшу­ге мәж­­бүр болды. Мәскеу­де тұ­рып, сол елдің намысын қор­­ға­ды. 2016 жылы Ресей­дің аты­­нан өзінің жас мөлшер­ін­де­гі­­лер арасындағы әлем чем­­пио­­на­­тына қатысып, топ жарды.
Бірақ, арада екі жыл өткенде дау шықты. Ресейлік жат­тықтырушы Евгений Соло­жен­кин 13 жасар спортшыға «Турнир кезінде қулық танытып, электрондық құралды пай­далану арқылы жеңіске жетті» деген айып таққан. Өз кезе­гінде Бибісара мұны жала екенін, өтірік сөз таратқан жаттықтырушы әрекетін «атын шығару үшін жасады» деп айтты.
«Бір жылдан астам уақыт бізге жағылған қара күйемен өмір сүрдік. Алайда әділдік орнады – FIDE Соложенкинді 18 айға шахматтан шеттетті. Сот менің де, Бибісараның да Соложенкинге қарсы арызын қанағаттандырды. Енді ол ақша төлейді. Сондай-ақ Бибісараны тыйым салынған құралдар пайдаланды деп айыптап мақала жазған басылымдар оның ақталғаны туралы ақпарат таратуға міндеттеледі. Біз өте ризамыз!» деп келтірді Sputnik.kz шахматшы қыздың анасы Лиана Таңжарықованың пікірін.
Ал 2019 жылы Бибісара елге оралды. Сол кезде Маң­ғыс­тау облысының әкімі бол­ған Ералы Тоғжанов отанда­сы­м­ыздың елге оралуына сеп­тігін тигізді. Осы күні Асау­баева жарыстарға Маң­ғыс­тау облысының атынан қатысып жүр.
Қазіргі кезде Бибісара 17 жаста. Өткен жылы әйелдер арасында онлайн өткен Азия чемпионатында жеңімпаз атанды.