Дамир Ысмағұловтың қарсыласы анықталды
UFC-дегі жеңіл салмақ өкілі Дамир Ысмағұлов (24-1) келесі жекпе-жегін америкалық Джалин Тернермен (13-5) өткізуі мүмкін.
Бұл туралы оның менеджері Саят Әбдірахманов мәлімдеді.
«Алдағы жоспарларға келетін болсақ, бұл инсайд емес, жай ғана болжам – ол рейтингте 14-орында тұрған Джалин Тернермен кездесуі мүмкін, – деді Әбдірахманов UNDERDOG entertainment YouTube-арнасына берген сұхбатында. – Оның қабілетін ескере отырып, Тернер осы салмақта кез келген спортшы үшін ыңғайсыз қарсылас деуге болады. Жеке басым оның Клаудио Пуэльяспен жекпе-жек өткізгенін қалаймын.
Жанкүйерлер, ұйым не қалайтынын ескеру керектігі түсінікті, бірақ менің міндетім – Дамирдің қалауымен санасу. Ол жиі кездесу өткізгісі келеді, қарсыласы ТОП-15-ке кірмесе де қарсы емес. Өзіңді көпшілікке таныту үшін жарқын айқас өткізу қажет».
Ысмағұлов жеңіл салмақта UFC рейтингінің 15-сатысында тұр. Ол аталған ұйымда бес жекпе-жек өткізіп, барлығында жеңіске жеткен.
Тернер UFC-де 14-сатыда келеді.
