Су спорты түрлерінен әлем чемпионаты басталды

Әр елдің сайдың тасындай іріктелген атлеттері жүзу, суға тұғырдан секіру, су добы, артистік жүзу мен ашық аспан астында суда жүзуден жүлдеге таласады, деп жазады drs_kz.

Назарларыңызға осы сындарда Қазақстан атынан кімдер өнер көрсететінін, қай уақытта өтетінін ұсынамыз.

Артистік жүзу сайысы 17-25 маусым күндері Мажарстан астанасындағы Тамаш Сецхи атындағы кешенде өтеді. Қазақстан құрамасының спортшылары: топтық сын – Наргиза Болатова, Әйгерім Құрманғалиева, Карина Абдулина, Ксения Макарова, Этери Какутия, Анна Павлецова, Юлия Рогалева, Валерия Столбунова, Жәния Жиенғазы, Арина Пушкина, Ясмин Тұяқова.

Жекелей сын – Карина Магрупова. Аралас жұптық сын – Эдуард Ким мен Жаклин Якимова. Ұлттық құраманың бас бапкері – Әлия Каримова.

Суда жүзу бәсекесі 18-25 маусым аралығында Будапешттегі «Дунай-Арена» суда жүзу кешенінде өтеді. Бұл жолы Ұлттық құрама көшбасшысы, Олимпиада чемпионы Дмитрий Баландин бұл чемпионатқа қатыспайды. Ел намысын қорғайтын атлеттер: Әділбек Мусин, Айбек Қамзенов, Александр Варакин, Аделаида Пчелинцева, Ксения Игнатова.

Су добы ойындарын Дебрецен қаласындағы спорт бассейні қабылдайды.

Ватерполдан әйелдер құрамасы С тобына түсті. Алғашқы ойында Аустралиямен (20 маусым), сосын Бразилия (22 маусым) және Жаңа Зеландиямен (24 маусым) ойнайды. Ал ерлер D тобында. Олар әуелі Аустралиямен (21 маусым), кейін АҚШ-пен (23 маусым), Сербиямен (25 маусым) шеберлік байқаспақ.

Ашық аспан астындағы суда жүзу Лупа көлінде өтеді. Чемпионатқа отандастарымыздан тәжірибелі Виталий Худяков, Диана Тасжанова, Ксения Романчук, Лев Черепанов аттанды. 26-27 маусымда аралас (4×1500 метр) және 5 километрлік ерлер, әйелдер бәсекесі өтеді. Ал 29-30 маусымға 10 және 25 шақырымдық жекелей жарыстар жоспарланған. Іріктеуде 22 елдің жүзгіштері бақ сынамақ.