Астанада пара-хоккейден ел чемпионаты аяқталды

Астанадағы «Тарлан» мұз айдынында тірек-қимыл аппараты зақымданған спортшылар арасындағы пара-хоккейден Қазақстан Республикасының чемпионаты мәресіне жетті.

Жарысқа еліміздің әр өңірінен — Астана қаласы мен Ақмола, Қостанай, Ақтөбе және Қарағанды ​​облыстарынан — бес команда қатысты. Мұз айдынына шыққан әртүрлі жастағы және шеберлік деңгейіндегі спортшылар командалық рух пен спорттық мінез танытып, Қазақстанда пара-хоккейді дамытуға деген ұмтылыстарын көрсетті.

Жарыс қорытындысы бойынша нәтижелер төмендегідей болды:

1-орын – Астана командасы

2-орын – Ақмола облысының командасы

3-орын –Қостанай облысының командасы

4-орын – Ақтөбе облысының командасы

5-орын – Қарағанды ​​облысының командасы

Бұл чемпионат елімізде пара-хоккейдің дамуындағы маңызды кезең болды. Қазақстанда аталған спорт түрінің ауқымы біртіндеп кеңейіп келеді: егер бірнеше жыл бұрын пара-хоккеймен небәрі санаулы спортшы ғана айналысса, қазіргі таңда бес өңірде командалар белсенді жұмыс істеуде.

Федерация балалар арасында осы спорт түрін дамытуға ерекше мән береді. Астанада жасөспірімдерге арналған пара-хоккей бағдарламасы жұмыс істеп тұр; ол тірек-қимыл аппараты зақымданған балаларға арнайы шаналарды пайдалана отырып ойнауға, мұз айдынында жаттығуға және турнирлерге қатысуға мүмкіндік береді.

«Қазақстанның пара-хоккей федерациясы атап өткендей, қарапайым конькиді кие алмайтын балалар үшін шана мұз айдынына шығуға, хоккейден өз бағын сынап көруге және нағыз хоккейшідей сезінуге мүмкіндік береді».

Қазақстандық спортшылар халықаралық аренадағы өз позицияларын да нығайтып келеді. Тамыз айында ұлттық құрама Чехияда өткен, жеті елден сегіз команда қатысқан «Olomouc Cup» халықаралық пара-хоккей турниріне қатысты. Жарыс қорытындысы бойынша Қазақстан командасы қола жүлдеге ие болды.

Қазақстан Республикасы чемпионатының қорытындысы бойынша жаттықтырушылар штабы мен федерация ұлттық құрамаға спортшыларды іріктеп алады. Одан әрі команда спорттық күнтізбеге сәйкес жаттығу жұмыстарын жалғастырып, халықаралық жарыстарға қатысады.

Ұлттық чемпионатты өткізу аймақтық командалар үшін бәсекелестік мүмкіндіктерін кеңейтуге, спортшылардың дайындық деңгейін арттыруға және ел өңірлерінде жастарға арналған пара-хоккей бағдарламаларын одан әрі дамытуға жағдай жасауға септігін тигізеді.

Чемпионат ұйымдастырушылары спорт түрлерін дамытуға және спортшыларды қолдауға қосқан үлесі үшін жобаның бас серіктесі – «Самұрық-Қазына» ұлттық әл-ауқат қоры» АҚ-қа, сондай-ақ Туризм және спортты қолдау қорына шынайы алғысын білдіреді.

Пара-хоккейді дамытуға және Қазақстан Республикасының чемпионатының өтуіне қолдау көрсеткені үшін Қазақстан Республикасының Туризм және спорт министрлігіне ерекше алғыс айтылады.

Чемпионат Қазақстанда пара-хоккейдің қарқынды дамып келе жатқанын, оның әртүрлі өңірлерден келген спортшылардың басын біріктіріп, мүмкіндігі шектеулі балалар мен ересектерге спортпен шұғылдануға, жарыстарға қатысуға және еліміздің намысын халықаралық аренада қорғауға жаңа мүмкіндіктер ашып отырғанын көрсетті.